Bremanger kommune er Sogn og Fjordane i miniatyr! Her får du ei oppleving av heile fylket – frå storhavet til isbre på nokre timar. Bremanger har ei spesiell historie. Heilt sidan siste istid har området vore i fokus for jakt, fangst og fiske. Folket her ute ved kysten har alltid hatt sterke kommunikasjonslinjer med resten av landet og Europa. Dette er det fleire døme på. Utgravingar kring Skatestraumen har avdekka nær 4000 år gamle reiskap frå Austersjøområdet. Vingen, Nord- Europas største helleristningsfelt, var truleg ein regional kultstad av rang, noko 4000 gåtefulle bilete i fjellet ennå i dag vitnar om.

I heile kommunen finn vi spanande spor av menneskeleg verksemd. Også i nyare tid har Bremanger vore ein møtestad, først og fremst ved at det rike sildefisket brakte tusenvis av ivrige fiskarar til Kalvåg. Etter krigen kom etableringa av ein moderne industristad i Svelgen. Omgrepet «kultur» tyder endring frå natur til kultur. Ingen andre kommunar har ei slik historie som oss, «Kulturkommunen Bremanger».